CYBER CRIME & SECURITY

Cyber kan tih mai hi Cybernetics lamtawi a nia, Electronics hmanraw hrang hrang inthlunzawm (Network) tihna a ni. Internet hi khawvela network lian ber a ni. ICT hman khawlohna avanga dan bawhchhiatna sual chi hrang hrang te hi Cyber crime tih a ni. Hetiang thilsual titu te hi cyber criminal tih an ni bawk.

Cyber crime langsar zual te:

Cyber crime hi tam tak a awm a, sawi vek sen a nilo. Tunlaia a langsar zual tlem han tarlang ila:

1.Phishing Scams : personal information rukchhuah leh virus thehdarh nana email message leh link ang chi hi a ni.Nitin sang tel teh meuh an dah thin.

2. Website Spoofing : Inbum nan company lian website rintlak leh tha tak ang an siam a, email hmangin a link an thehdarh thin. An turm ber chu data pawimawh rukchhuah te, pawisa lakchhuah leh virus thehdarh a ni. Kum 2019 khan 1.3 Billion (vaibelchhia) Dollar t ruk a ni.

3. Ransomware : Virus chi khat hmangin Computer leh smartphone a file /record pawimawh an thuhnun vek a, hman theih loh turin file an encrypt a, password hmangin an lock thin. pawisa tam tham tak an phut let thin.

4. Malware : “malicious software” a ni a, a tum ber chu Computer leh smartphone a file /record pawimawh tihchhiat leh rukchhuah a ni. A langsar zual te chu Trojans, Worms, Ransomware leh Botnets te an ni.

5. IOT Hacking: Internet/ Network klatlanga thunun theih tunlai hmanraw hrang hrang te hnathawk theilo turin an tibuai a, record pawimawh tak tak an ru chhuak thin.

6. Whaling cyber : Sorkar leh company Executive /Senior officer leh mi hausa sum ruksakna tura tawkdarh it awm tak nena inbumna (Phishing) hi alar hle bawk. Chief executive /financial officer te an buma, Sorkar leh company record /information pawimawh tak tak an laksak bawk thin.

Hei bakah hian browser pangngai Chrome, Firefox or Safari te hmanga hawn theih loh tura thuhruk tlat Dark Web a awm bawk. He website a thu dahkhawm leh inthawnkual reng reng hi Internet a thil zawnna Google leh Bing te pawhin an hmuh theih loh tura thuhruk a ni. Ralthuam leh ruihhlo sumdawn ruk nan an hmang nasa hle bawk.

Engvangin nge “National Cybersecurity Awareness month”hman anih?

Kumin 2021 kum tir khan khawvela internet hmangtu te hi 825.30 million( maktaduai) vel zet kan ni a, Social media hmangtu zawng zawng te hi 78 billion (tluklehdingawn) zet kan ni bawk. Internet hmangtu te hian social media hrang hrang kan hmang uar tih a chiang hle. Center for Internet Security tarlan danin, kum 2015 khan Financial, Bussiness, Education, healthcare leh public sector a personal record pawimawh maktaduai 169 lai khawih chingpen a ni.

Hetihlai hian, Internet hmanga Sumdawng zingah 23% te chauvin internet security policy an nei. Khawvel pumah cyber crime vangin kumtin mi maktaduai 594 vel zet ten buaina an tawk thin. 2020 hnu lam hian internet hmanga hmanraw (IOTs) thlunzawm leh thunun theih tluklehdingawn 24 vel zet awm tura chhut a ni bawk. Heivang hian kan himna kawnga hmalak hi a tul hle a ni.

Cyber crime incidents langsar zual te:

1.Global

Kum 1988 khan Robert Morris, American computer scientist chuan Internet a computer virus hmasa ber "Morris computer worm" a siam a. He virus hian darkar 24 chhung lekin kha tih hunlaia internet backbone ARPANET (Advanced Research Projects Agency Network) computer 6000 (10% ) lai a khawih chhia a. US $10,050 lai chawitir ani.

Kum 2018 khan Internet a sorkar leh mimal record pawimawh a enruk leh ruk chhuah a midang hnena thawndarh (Data breaches)a lar hle. Facebook Cambridge Analytica Data breaches kha a nasa ber a ni. Kum 2018 May thla chhung ringawt khan Data breaches avangin 17,273,571 records khawih chingpen a ni a, Facebook pawhin an hmingchhiat phah nasa hle kha .India rama facebook hmangtu 5.6 Lakh te record pawimawh rukchhuah a ni.Kum 2010 a khawvel pum huapa Smartphone kan hman lar hnu ah cyber ataccker te chuan smart phone an target chho nghal a. Kum 2015 ah Android lock-screen ransomware hmangin US leh ram hrang hrang a smartphone hmangtu maktaduai 78.8 zet te tihbuaia ni.

2. India ramah

Kum 2016 khan Debit Card Breach avangin 3.2 million users ten debit card PINs tihchingpen a ni. Kum 2017 khan Virus chi khat WannaCry ransomware khawvel pumah a darh chiam mai a. 200,000 computers a khawih buaia, Khawvel economics a tihchhiat pawh Dollar tluklehdingawn aia tam a tling. India pawh a tuar nasa ber zinga mi kan ni. Cyber security laboratory thahnem tak India sorkar pawhin a din phah nghe nghe. India ah ringawt pawh kum 2017 khan cyber attack vanga data khawih chingpen te hi Rs 4,552 vela a ni. 2018 khan Cosmos Cooperative Bank Ltd. Pune ATM server an hack a, Rs.94.42 crores lai an ruk sak. 2018 ah tho khan Canara bank ATM servers hack a ni a, Rs 20 Lakh lai an ru bawk.

Mizoram :

Mizoram a Cyber Crime thubuai ziahluh hmasak ber chu May 20, 2009 kha a ni. Reverend pakhat chuan SP Aizawl hnenah FIR a submit a. He FIR-a a lan dan chuan mi tu tih hriat loh ten a Email Password (HOTMAIL) an lo thlak saka, amah chu London a zina, a wallet ti bo leh Hotel Bill pawh pek tur nei tawh lo anga in sawi in, Western Union kaltlanga US Dollar 2500 puk tir turin email hmang hian an thawndarh sak.

Mizoramah pawh Cyber crime thubuai hi kum tina pung zel a, Social Media leh Mobile Phone hmanga Pawisa lama inbumna te, Social Networking Sites kaltlanga inbumna te leh Copy Right Reserve chungchangah cases register a tam hle. Cyber crime thlen chhan tam ber chu phuba lak nan emaw, hlimhlawp nan emaw, sum leh pai hlawhchhuah nan emaw tih a ni tlangpui. copyright buaina a langsar hle bawk. Buy and Sale group hrang hrang-ah bungraw inthleng (Swap) ang chi te hi rukru ten an hmang nasa hle.March - Sept 2017 khan Rs. 40,05,000 chuang online hmanga inbumna hmanga mizo mipuite sum ruksak an ni.

Do Your Part. Be Cyber Smart.

Cyber crime laka ilo him zawk nan Computer/Mobile, software update leh antivirus update rawh.File leh Data tullo paih la,personal data pawimawh Digilocker (digilocker.gov.in/) ah backup rawh. Email check la, Inbox leh spam folder a message tangkailo te paih rawh. Online banking, social media (Fb, Twitter, insta .e.ct) password thuam tha rawh. Weak password (i.e sanga123) ang hi a himlo. Strong password (i.e Sang@#123) ang hi hman hmang rawh. Login Id hrang hrang tana password in ang hman hi a him lo, password hrang hmang thin ang che.

Online game, social media, online shopping leh Mobile banking thleng kan uar chho ve mek zel a, Social media, website, blog leh youtube channel eizawn nana hmang kan awm nual bawk.Hetih lai hian nang leh kei hi cyber crime tuartu (Cyber Victim) kan ni thei a, midang pawikhawihtu (cyber criminal) kan ni thei bawk.You tube channel, website leh mobile apps te hi sum tam tak senga siam a ni a, khawih chhiah emaw, dan lova hman te hi crime lian tak a ni. A neitu phalna neilova, youtube a music video, movies, audio upload te hi thubuai lian tak neih theihna a ni. Keimahni himna mai bakah midang himna ngai pawimawh ila, Cyber security Awareness hi October thla mai bakah kumtluanin ngai pawimawh zel ang u..